काठमाडौँ– राप्रपाबाट अलग भएर राष्ट्रिय प्रजातन्त्र पार्टी प्रजातान्त्रिक गठन गरेका पशुपति शम्शेर राणाले निर्वाचन आयोगको निर्णयविरुद्ध सर्वोच्चमा मुद्दा दायर गरेका छन् ।
दल दर्ताका लागि समर्थनसहितको हस्ताक्षर आयोगमा बुझाइएको भए पनि पुनः सनाखत गर्नुपर्ने निर्णय खारेजीको माग गर्दै मुद्दा दर्ता गरेको हो ।
‘कुनैपनि व्यक्तिको राजनीति गर्ने अधिकारको हनन भएको छ’ राणाले दायर गरेको रिटमा भनिएको छ । त्यस्तै राप्रापा प्रजातान्त्रिकले यसअघि दल दर्ताका क्रमममा निर्वाचन आयोगमा दस्तखत गरिसकेका केन्द्रीय सदस्यहरुले पुनः दस्तखत गर्नुपर्ने भन्ने आयोगको निर्णय खारेज गर्न माग गरिएको नेता दिपक बोहोराले बताए ।
आज अध्यक्ष राणाले दर्ता गरेको रिटमा आफ्नो पार्टीका केन्द्रीय सदस्यहरु कमल थापाले अपहरण गरेर बन्धक बनाएको भन्दै सर्वोच्च अदालतमा आरोप लगाएका छन् ।
सर्वोच्चमा मुद्दा दर्ता गर्न अध्यक्ष राणासँगै नेताहरु दीपक बोहोरा, विक्रम पाण्डे, धु्वबहादुर प्रधान लगायतका नेता कार्यकर्ता पुगेका थिए । रिटमा राप्रपा प्रजातान्त्रिकले निर्वाचन आयोगबाट मान्यता पाउन लागेको अवस्थामा राप्रपाका कमल थापाले आफ्ना नेता कार्यकर्तालाई अपहरण गरेको, धाकधम्की देखाएको तथा बन्धक बनाएकाले शान्ति सुरक्षाको माग समेत गरिएको छ ।
त्यस्तै रिटमा थापाले अपहरण गरेर हेटौडामा राखेका आफ्ना पार्टीका केन्द्रीय सदस्यहरुको रिहाइको माग समेत गरिएको छ ।
रिटको आइतबार पेशी तोकिएको छ ।
दुई साताअघि पशुपति शमशेर राणाले दल दर्ताका लागि निर्वाचन आयोगमा निवेदन दिएका थिए । उनले ४० प्रतिशत केन्द्रीय सदस्य र २० जना सांसदको सनाखतसहितको आवेदन बुझाएको दाबी गरेका थिए । तर, कमल थापा पक्षले भने राणाले ४० प्रतिशत पुर्याउन नसकेको भन्दै आयोगमा दिएको निवेदन खारेज गर्न माग गर्दै आएको थियो । आयोगले राप्रपा राणा समूहलाई हस्ताक्षर जुटाउन भदौ ४ गतेसम्मको म्याद दिएको थियो । यसैबीच राणा पक्षले हस्ताक्षर आयोग बुझाइरहेको बेला आफ्ना पक्षका केन्द्रीय सदस्य कमल थापाले अपहरण गरेर हेटौडा लगेर बन्धक बनाएको आरोप लगाएको छ ।
दुई पार्टीबीचको विवाद सर्वोच्च अदालत पुगेपछि विवादले नयाँ मोड लिएको छ ।
