लण्डन १८ असाेज। बेलायती सेनामा नेपालीहरू भर्ति हुन शुरू गरेकाे दुइ सय वर्ष पुग्न लागेकाे अवसरमा बेलायतमा गाेर्खा शालिककाे अनावरण गरीएकाे छ । बेलायतको फोक्सटनमा आइतबार गोर्खा शालिकको अनावरण गरिएको हाे ।
गोर्खाली चेली भनेर समेत चिनिने चर्चित बेलायती अभिनेत्री जोआना लुम्लेले एक भव्य समारोहकाबीच शालिक अनावरण गरिन ।
अनावरण कार्यक्रममा सहभागी हुनकै लागि बेलायत आएकी नेपालकी पूर्व उपप्रधान तथा परराष्ट्रमन्त्री सुजाता कोइराला पनि त्यसअवसरमा सहभागी थिइन ।
सो समारोहमा कार्यवाहक नेपाली राजदूत तेजबहादुर क्षेत्री, ब्रिगेड अफ गोर्खाजका कर्णेल, केन्टका मेयरसहित बेलायती र नेपाली समुदायका विशिष्ट व्यक्तित्वहरुको उपस्थिति थियो ।
त्यसअवसरमा ब्रिगेड अफ गोर्खाजले एक विशिष्ट प्रस्तुति दिएको थियो भने लिम्बु, राई लगायतका विभिन्न नेपाली जातीय संघसंस्थाको अग्रसरतामा च्याब्रुंग, साकेला, खुकुरी नाच लगायतका नेपाली सांस्कृतिक नृत्य पनि देखाइएको थियो ।
झण्डै ७० हजार पाउण्डको लागतमा बनेको शालिकको उचाई १२ फिट र तौल ८ टन छ । शालिक निर्माणका लागि उत्कृष्ट मानिने उच्चस्तरको तामा प्रयोग भएको शालिक बेलायती कलाकार रिबेका हकिन्सले डिजाइन तथा निर्माण गरेकी हुन ।
फोक्सटनका पूर्व काउन्सिलर धन गुरुंगको अगुवाईमा सन २००९ देखि नै शालिक निर्माणको अभियान सुरु गरिएको थियो ।
शालिकका लागि आवश्यक सबै रकम मुख्यत स्थानीयहरु आफैले संकलन गरेका हुन । भूतपूर्व गोर्खा, बेलायतस्थित नेपाली समुदाय र बेलायती समुदायका सदस्यहरुले पनि शालिकका लागि आर्थिक सहयोग प्रदान गरेका थिए ।
यो शालिकलाई सर्वसाधारणको पहलबाट निर्माण गरिएको पहिलो गोर्खा शालिक मानिएको छ । 
