लन्डन । शेर्पा संघ बेलायतले नेपालमा हालै आएको बाढी–पहिरोबाट प्रभावित नागरिकहरूको उद्धार तथा राहतका लागि रु ७ लाख ६ हजार ७५५ सहयोग प्रदान गरेको छ। उक्त रकम नेपाल सरकारको प्रधानमन्त्री दैवीप्रकोप राहत कोषमा जम्मा गरिएको महासचिव नोर्बु शेर्पाले जानकारी दिए।
संघका अध्यक्ष रिन्जी लामा शेर्पाका अनुसार बेलायतमा रहेका सदस्यहरूबाट संकलित उक्त रकम नेपालका बाढीपीडितहरूको सहयोगार्थ पठाइएको हो। उनले विपद्को कठिन घडीमा सबैलाई सहयोगका लागि एकजुट हुन आह्वानसमेत गरेका छन्।
शेर्पा संघ बेलायतले बाढी–पहिरोमा परी अकालमा ज्यान गुमाउनु भएका सबैप्रति हार्दिक श्रद्धाञ्जली अर्पण गर्दै शोकाकुल परिवारजनप्रति गहिरो समवेदना व्यक्त गरेको छ। साथै विस्थापित तथा प्रभावित परिवारप्रति सहानुभूति प्रकट गर्दै राहत तथा पुनर्स्थापनामा सहयोग निरन्तर रहने जनाएको छ।
प्राकृतिक विपद्का कारण प्रभावित नागरिकहरूको सहयोगार्थ सञ्चालन गरिएको यस अभियानमा सहयोग गर्ने सम्पूर्ण सदस्यहरूलाई संघले धन्यवाद व्यक्त गरेको छ।
सन् २००३ मा स्थापना भएको शेर्पा संघ बेलायतले नेपालमा विभिन्न सामाजिक तथा मानवीय कार्यहरूमा निरन्तर सहयोग गर्दै आएको छ।
