सिड्नी । पछिल्लो केही समययता अस्ट्रेलियामा रहेका नेपाली समुदायबीच बढ्दै गएका विभिन्न गैरकानुनी घटनाहरु प्रति सरोकारवालाहरुले चिन्ता एवं चासो व्यक्त गरेका छन् । सिड्नीमा आयोजित एक कार्यक्रमका सहभागीहरुले दिनानुदिन बढ्दै गईरहेका विभिन्न प्रवृतीका गैरकानुनी गतिबिधि र घरेलु हिंसा प्रति चिन्ता गरेका हुन् ।
न्यु साउथ वेल्स स्थित नेपाली वाणिज्य दूतावासको आयोजना तथा अष्ट्रेलियन नेप्लिज जर्नलिस्ट एशोसिएसन (एन्जा) को सहकार्यमा सम्पन्न ‘सेफ स्टेप’ कार्यक्रमका सहभागीहरूले यस्ता घटनाहरू न्यूनीकरण गर्न सम्पूर्ण समुदाय तथा सरोकारवालाबीच सहकार्य अपरिहार्य रहेकोमा जोड दिएका छन् । कार्यक्रममा न्यु साउथ वेल्स पुलिस फोर्सका डिटेक्टिभ सर्जन्ट सुदीप स्वारले अष्ट्रेलियामा हुने नेपाली समुदायको सहभागीतामा अस्ट्रेलियामा भएका केही गैरकानुनी घटनाक्रमहरुको विवरण उल्लेख गरेका थिए । उनले प्रस्तुत गरेको तथ्यांक अनुसार एनएसडब्ल्यू राज्यमा मात्रै प्रत्येक महिना १० देखि १५ जना नेपाली मूलका व्यक्तिहरु बलात्कार, यौनजन्य हिंसा, घरेलु हिंसा र लागुऔषध दुर्व्यसनजस्ता गम्भीर प्रकृतिका आपराधिक क्रियाकलापमा संलग्न भई जेल चलान हुने गरेका छन् । उनले यस्ता गतिबिधिहरुलाई तत्कालै नियन्त्रण गर्नुपर्ने भन्दै त्यसो गर्न नसकिए भविष्यमा नेपाली समुदायले गम्भीर अवस्था ब्यहोर्नुपर्ने स्थिति आउने बताए । उनले यस्ता प्रकृतीका घटना कहीँ कतै भएको देखे तुरुन्त स्थानीय प्रहरीलाई जानकारी दिनसमेत आग्रह गरेका छन् । वाणिज्यदूत सञ्जिव शर्माले यस्ता आपराधिक क्रियाकलापले नेपालीको छवि धमिलाएको भन्दै सचेतना जगाएर यसको न्यूनिकरणका सवल अभ्यासहरु अबलम्बन गर्नुपर्ने बताए । यसका लागि सम्बद्ध सबैको साथ र सहकार्य आवश्यक रहेको उनको भनाई थियो ।
एनआरएनए अष्ट्रेलियाका अध्यक्ष अनिल पोखरेलले महत्वपूर्ण कार्यक्रमको आयोजना गरेकोमा दुवैसंस्था प्रति धन्यवाद व्यक्त गर्दै भविष्यमा एनआरएनएले पनि यस्ता सचेतनामूलक कार्यक्रम गर्न सहकार्य गर्ने बताए । कार्यक्रममा एन्जाका अध्यक्ष कृष्ण तिवारीले पछिल्ला घटनाक्रमहरुले नेपाली समुदाय सचेत बन्नुपर्ने अवस्था आएको बताउँदै यी र यस्तै सचेतनामूलक कार्यक्रम आमतहमा सञ्चालन गर्नुपर्ने बताए । संस्थापक अध्यक्ष एवम् पत्रकार हेमन्त काफ्लेले नेपालीहरु प्रत्यक्ष संलग्न भएका केही घटनाक्रम सहित कानुनी समस्या, घरेलु हिंसा, लागुऔषध सम्बन्धी चुनौती, इभेन्टसका नाममा हुने गरेको भनिएको मानव तस्करी, हुण्डी लगायतबारे धारणा राखेका थिए । कार्यक्रमका सहभागीहरूले घरेलु हिंसा र लागुऔषध दुर्व्यसन सम्बन्धी अष्ट्रेलियाली कानुन तथा नेपालीहरूले जान्नैपर्ने विविध विषयमा प्रश्न राखेका थिए भने प्रहरी अधिकारीहरुले यसबारेमा जवाफ दिएका थिए । कार्यक्रममा एन्जाका सल्लाहकार डा. राजु मानन्धर, नवाजका अध्यक्ष चिरन तिवारी, कर्णाली समाज अष्ट्रेलियाका अध्यक्ष सुमन कार्की, पत्रकारहरू प्रकाश हुमागाईं र केदार रायमाझी लगायत करिब तीन दर्जन पेशाकर्मी, व्यवसायी तथा विद्यार्थीहरूको उपस्थिति रहेको थियो । कार्यक्रमको संयोजन तथा सहजीकरण एन्जाका महासचिव तथा वाणिज्यदूतावासका सूचना अधिकारी गणेश भट्टले गरेका थिए ।
