काठमाडौं । नेकपा प्रचण्ड-माधव पक्षकी नेत्री रामकुमारी झाँक्री रिहा भएकी छिन् ।
महानगरीय अपराध महाशाखाको टोली झाँक्रीलाई राज्यविरुद्धको अपराध गरेको अभियोगमा पक्राउ गरेको थियो । हिरासतमा परेको साढे ५ घण्टापछि झाँक्री रिहा भएकी हुन्।
महानगरीय अपराध महाशाखाका प्रमुख एसएसपी दीपक थापाले रामकुमारीलाई उनका श्रीमान पशुपति पुरीको जिम्मामा रिहा गरिएको जानकारी दिए ।
चौतर्फी दवाव भएपछि यसअघि प्रहरीले नेता योगेश भट्टराईको जिम्मामा रिहा गर्ने बताएको थियो । तर भट्टराईले मानेनन् ।
झाँक्रीलाई उनकै घरबाट प्रहरीले दिउँसो १ बजे राज्यविरुद्धको अपराध मुद्धामा पक्राउ गरेको थियो ।
हिरासतको क्रममा उनले दिएको अभिव्यक्तिको विषयमा सोधपुछ गरिएको थियो । उक्त क्रममा झाँक्रीले राष्ट्रपति एक संस्था भएको र उक्त संस्थाप्रति आफ्नो पूर्णतः सम्मान भएको तर गलत प्रवृतिको विरोध गरेको बताइन् ।
यसैवीच रिहा भएपछि बोल्दै नेत्री झाँक्रीले प्रतिगमन परास्त हुँदै गएको बताएकी छिन् । ‘देशभर भएको प्रदर्शन र दबावको अगाडि प्रतिगमन झुक्ने प्रक्रिया सुरु भएको छ । हामी जित्दैछौं ।’उनले भनिन् ।
झाँक्री पक्राउ परेसँगै देशभर चौतर्फी आलोचना तथा विरोध भएको थियो ।
