भद्रपुर– गर्मीको मौसम, त्यसमाथि तातो घाम । क्षमताभन्दा तेब्बर कैदीबन्दीका लागि कारागारको बसाई कष्टकर नहुने कुरै भएन तर आइतबार झापा कारागारका एक हजार २३ जना कैदीबन्दीले राष्ट्रिय कलाकार मनोज गजुरेलको प्रेरक प्रस्तुतिका कारण मनोरञ्जन मात्र होइन, शीतल पनि महसुस गरे ।
कैदीबन्दीको मानवअधिकार प्रवद्र्धन गर्ने उद्देश्यले सिस्नोपानी नेपालको प्रस्तुतिमा चन्द्रगढीस्थित झापा कारागारमा हाँस्यव्यङ्ग्य शिविर सञ्चालन भएको थियो । कार्यक्रममा प्रख्यात कलाकारसँगै गीत, कविता र नृत्यसमेत देखाउन पाएर कैदीबन्दी हर्षित बनेका थिए ।
हाँस्यकलाकार मनोज गजुरेलले काराबासको बसाइलाई निराशामा होइन, विगतका कमजोरी सच्याएर भविष्यमा नयाँ जीवन जिउने आशामा परिणत गर्न कैदीबन्दीलाई आग्रह गरे ।
उनले देशको ठूला पदमा पुगेका व्यक्तिसमेत जीवनको कुनै कालखण्डमा कारागारमा बसेको चर्चा गर्दै काराबासलाई विश्वविद्यालयसँग तुलना गरे ।
कार्यक्रममा कैदीका तर्फबाट रमेश पोखरेलले कविता प्रस्तुत गरिरहँदा अतिथि कलाकार गजुरेलसँगै झापाका प्रमुख जिल्ला अधिकारी जनकराज दाहालले ताली बजाएर प्रशङ्सा गरेका थिए ।
कैदीबन्दीका लागि मानवअधिकार प्रवद्र्धन गर्ने र उनीहरुमा आत्मविश्वास जगाउने लक्ष्य लिएर प्रदेश नं १ को आन्तरिक मामिला तथा कानून मन्त्रालयले विभिन्न जिल्लास्थित कारागारमा यस्तो कार्यक्रमको आयोजना गर्दै आएको छ ।
