मोदीलाई अमेरिकी राष्ट्रपति ओबामाको फोन, के-के भयो कुराकानी ?

काठमाडौं, २५ कात्तिक । अमेरिकी राष्ट्रपति बराक ओबामाले भारतका प्रधानमन्त्री नरेन्द्र मोदीलाई टेलिफोन गरेका छन् ।
मंगलबार राति भएको टेलिफोन वार्तामा अमेरिकी राष्ट्रपति ओबामाले मोदीलाई सुरुमा दिपावलीको शुभकामना दिएका छन् । र दुबै जनाले अर्काे हप्ता टर्कीमा सुरु हुने जी-२० शिखर सम्मेलनका क्रममा भेटवार्ता गर्ने प्रतिबद्धता जनाएका छन् ।
टेलिफोन वार्तापछि मोदीले भारतीय सञ्चारमाध्यमलाई भनेका छन्- ‘मंगलबार राति अमेरिकी राष्ट्रपतिले मलाई फोन गर्नुभयो । हामीले एकआपसमा दिपावलीको शुभकामना बाड्यौं । भर्खरै स्थापित हटलाईनमा यो हामीबीचको पहिलो कुराकानी थियो । राष्ट्रपति ओबामा र म जी-२० शिखर सम्मेलनका क्रममा टर्कीमा भेट्ने कुरा पनि भएको छ ।’
समाचार अनुसार मोदीसँग अमेरिकी राष्ट्रपति ओबामाले अन्य थुप्रै मुद्दामा चाँसो राखेका थिए । जसमा नेपाल भारत सीमा क्षेत्रमा देखिएको अवरोधको विषय पनि रहेको भारतीय सञ्चारमाध्यमले दाबी गरेका छन् । ‘भारत र नेपालबीचको सीमा नाका अवरोधका बारेमा पनि ओबामाले गम्भीर चाँसो राखेका थिए ।’ समाचारमा भनिएको छ ।
उसो त अमेरिकाका नेपालीले समेत नाकाबन्दीविरुद्ध ह्वाइट हाउस अगाडि प्रदर्शन गर्ने तयारी गरेका छन् भने नेपालस्थित अमेरिकी राजदूतावासले सूचना जारी गरेर नेपालमा नाकाबन्दीको अवस्था रहेकाले अमेरिकी नागरिकलाई नेपाल नआउन सुझाव दिइसकेको छ । जसका कारण ओबामा भारतीय नाकाबन्दीबारे जानकार रहेको विश्लेषकहरु बताउँछन् ।