–सुरेन्द्र इङ्नाम
केन्ट (बेलायत) विश्व नेपाली साहित्य महासङ्घ साउथ यूकेले १०९ औं महाकवि लक्ष्मीप्रसाद देवकोटा जयन्ती केन्टमा एक कार्यक्रम आयोजना गरी मनाएको छ ।
दुई चरणमा भएको कार्यक्रमको सुरुमा महाकवि देवकोटाको फोटोमा संयुक्त रुपमा माल्यार्पण गरिएको थियो । त्यसपछि गीतकार टि माया राईले महाकवि देवकोटाको जीवनी प्रस्तुत गरेका थिए ।
पहिलो चरणमा स्रष्टाद्वय दिपेन्द्र थुलुङ राई र लाहाङ चेम्जोङलाई सम्मान गरिएको थियो । महासङ्घ केन्द्रले रसियन भाषामा प्रकाशित गरेको कविताहरुको संग्रह नेपाली कविता कुञ्ज पनि बिनेसाम साउथका अध्यक्ष बिजय हितान र साहित्यकार घन थापाले संयुक्त रुपमा विमोचन गरे ।
कार्यक्रममा कवि घन थापा, टि माया राई, अमित थेबे, लोकबहादुर गुरुङ, लाहाङ चेम्जोङ, बिजय हितान, विश्वास दीप तिगेला, औतारी साईला र चन्द्रावती राईले सिर्जना वाचन गरेका थिए
जानुका पुन मगरले ‘ए कान्छा ठट्टैमा यो बैश जान लाग्यो….’ बोलको गीत तथा मोहन लिम्बुले आफ्नै कम्पोज र शब्द रहेको गीत गायकीमा प्रस्तुत गरेका थिए । त्यस्तैगरि सुरेन्द्र इङ्नामले बाँसुरीमा देबकोटाको गीति कविता कुन मन्दिरमा जान्छौ यात्री, कुन मन्दिरमा जाने हो बजाएर सुनाएका थिए ।
दोस्रो चरणको समिक्षात्मक कार्यक्रममा अमित थेबेले शोभा कुमारी गजुरेलद्वारा लिखित संविधान कसका लागि नामक कविता संग्रहको समिक्षा गरे । उक्त संग्रहमा ६४ वटा कविताहरु अटाएका छन् । लेखिका आफै द्वन्द्वकालमा विस्थापित भएर जर्मनी, बेल्जियम हुँदै फ्रान्स आएर बसोवास गरिरहेकी छिन् । कविता संग्रहको यो संविधान कसका लागि शीर्षकको कविता पनि वाचन गरेका थिए । कवियत्री वामपन्थी नेता सीपी गजुरेलको सुपुत्री हुन ।
दिउँसो १२ बजेबाट शुरु भएर साँझ ५ बजेसम्म चलेको उक्त समारोहलाई समारोहका अध्यक्ष तिगेलाले युकेमा आउँदो वर्ष विश्व साहित्य सम्मेलन गर्ने योजना पनि रहेको बताए ।
महासङ्घका केन्द्रीय अध्यक्ष विश्वास दीप तिगेलाको अध्यक्षतामा सम्पन्न समारोहमा बेलायत तथा नेपालबाट आएका साहित्यप्रेमी र साहित्यनुरागीहरुको बाक्लो उपस्थिति रहेको थियो । कार्यक्रमलाई साउथ शाखाका अध्यक्ष विजय हितानले सञ्चालन गरेका थिए ।
