काठमाडौं, २५ माघ। प्रधानमन्त्री सुशील कोइरालाको वक्तव्य ध्यान दिएर पढ्ने हो भने त्यो मूर्त एवं विपक्षी मोर्चाको मागअनुसार नै रहेको शान्ति तथा पुननिर्माण एवम् कानुनमन्त्री नरहरी आचार्यले स्पष्ट पारेका छन् ।
प्रधानमन्त्रीको वक्तव्य लेखनमै सहभागी बनेका मन्त्री आचार्यले प्रधानमन्त्रीको वार्ता आह्वानमा कुनै अन्य नियत नरहेको बताए ।
‘शान्ति प्रक्रिया र जनआन्दोलनको कुरा गरेपछि १२ बुँदे, ८ बुँदे, सातबुँदे, चारबुँदे, २२ बुँदे सबै बुँदाहरु त्यसैमा समेटिएका छन्, शान्ति सम्झौतादेखि अन्तरिम संविधानको कुरा त्यहीँभित्र छन्’ आचार्यले आइतबार अनलाइनखबरसँग भने ।
एमाओवादी मोर्चाले औपचारिकरुपमा सरकारलाई कुनै प्रतिक्रिया नपठाए पनि अनौपचारिक तहबाट सम्पर्क भएको मन्त्री आचार्यले बताए । ‘प्रचण्डजी काठमाडौं फर्किएर वार्ताको प्रक्रिया शुरु गर्ने कुरा छ’ आचार्यले भने ।
प्रधानमन्त्रीले गरेको वार्ताको आह्वान अमूर्त रहेको एमाओवादी नेताहरुले प्रारम्भिक प्रतिक्रिया दिइरहेकै बेला मन्त्री आचार्य वक्तव्य राम्रोसित पढ्न आग्रह गरेका हुन् ।
विपक्षी मोर्चालाई सहमतिमा ल्याउन मन्त्री आचार्यले केही दिनदेखि प्रयत्न गर्दै आइरहेका छन् । यसक्रममा उनले सत्य निरुपण तथा मेलमिलाप आयोगसमेत तत्काल गठन गर्ने गृहकार्य अघि बढाएका छन् ।
