चितवन, ६ जेठ । भरतपुर महानगरपालिकाको मतगणना कार्य १५ घन्टा रोकिएर पुनः सुरु भएको छ । मतगणना कार्य सन्तोषजनक नभएको भन्दै नेपाली काँग्रेस, नेकपा (माओवादी केन्द्र) र राप्रपाले विरोध जनाएपछि हिजो साँझ– ७ बजेदेखि रोकिएको मतगणना कार्य आज पाँच दलबीच १० बुँदे सहमति भएपछि बिहान १० बजेबाट पुनः सुरु गरिएको हो ।
सहमति अनुसार प्रमुख निर्वाचन अधिकृतले एकजना सूचना अधिकृत तोकी निजले एकद्वार प्रणाली अन्तर्गत मात्र सूचना सम्प्रेषण गर्ने, मतगणनाका लागि आवश्यक जनशक्ति मात्र राख्ने, गणनास्थलमा दलको प्रमुख वा प्रतिनिधिको छुट्टै डेस्क राख्ने सहमति भएको छ ।
त्यसैगरी प्रत्येक समूहबाट आउने मतगणनाको परिणाम राजनीतिक दलका प्रतिनिधि रहेको डेस्कमा देखाएपछि सार्वजनिक र कम्प्युटर इन्ट्री गर्ने व्यवस्था गर्ने सहमति भएको छ ।
