लन्डन– सहारा क्लबको आयोजनामा १७ जनवरीदेखि पोखरामा हुन लागेको १५ औं आहा रारा गोल्ड कप २०१७ का लागि सहारा यूके टोली नेपाल प्रस्थान गरेको छ ।
सहारा यूके अध्यक्ष मीनबहादुर गुरुङ (साइँला) को नेतृत्वमा शुक्रबार साँझ टोली काठमाडौंतर्फ उडेको छ । सहारा यूकेबाट यो वर्ष करिब ४० जना नेपाल जाने छन् । खर्च बढेपछि केही वर्षदेखि खेलाडी लैजान भने रोकिएको छ ।
२८ जनवरीमा फाइनल हुने उक्त प्रतियोगिताका प्रथम विजेतालाई ५ लाख रुपैयाँ पुरस्कार छ । प्रतियोगितामा राष्ट्रिय तथा अन्तर्राष्ट्रिय १२ टिमले भाग लिंदैछन् ।
सहारा यूकेले प्रत्येक दिन म्यान अफ द म्याच ट्रफी प्रायोजन गर्नेछ । गुरुङ अध्यक्ष भएपछि उनले ट्रफीसँगै म्यान अफ द म्याच विजेतालाई तीनहजार रुपैयाँ नगद समेत दिने निर्णय भएको छ ।
गुरुङले आफ्नो संस्थाले सहारा एकेडेमीको दुई करोडको अक्षयकोष स्थापनामा यथाशक्य सहयोग गर्ने प्रतिवद्धता अनुरुप १० लाख रुपैयाँ उठाइसकेको जनाए ।
