काठमाडौँ- वरिष्ठ सङ्गीतकार अम्बर गुरुङको स्वास्थ्य स्थिति गम्भीर रहेको चिकित्सकले जनाएका छन् ।
उनको उपचार भइरहेको ग्रान्डी अन्तर्राष्ट्रिय अस्पतालले सोमबार पत्रकारसम्मेलन गरी उनको स्वास्थ्य स्थितिबारे जानकारी दिएको हो । पत्रकारसम्मेलनमा उपचारमा संलग्न डा चक्रराज पाण्डेले भने, ‘उहाँको स्थिति साह्रै नाजुक छ । उहाँलाई भेन्टिलेटरमा राखेर हामीले जतिसक्दो उपचार गरिराखेका छौँ । दिनुपर्ने सेवा दिइराखेका छौँ ।’
उनले गुरुङको रक्तस्रावका कारण फोक्सोमा रगत गएकाले उनको श्वासप्रश्वासमा जटिल समस्या आएको जानकारी दिँदै भने, ‘कति मिनेट वा घन्टामा के हुन्छ भन्ने स्थिति छैन ।’
उनका जेठा र माइला सुपुत्र किशोर र राजु गुरुङले मंगलबार केही सञ्चारमाध्यममा निधन भएको भन्ने समाचारमा आएको कुरा निराधार भएको बताउँदै सञ्चारमाध्यलाई संयमित भएर काम गर्न आग्रह गरे । राजुले भने, ‘आज बाहिर आएका हल्ला निराधार हुन् । उहाँ अस्वस्थ हुनुहुन्छ तर जीवितै हुनुहुन्छ ।’
खानेनलीमा समस्या, श्वासप्रश्वासमा जटिलता, मधुमेह, पार्किसन्स तथा उच्च रक्तचापलगायत समस्याले ग्रसित गुरुङ एक सातादेखि ग्रान्डी अस्पतालमा उपचाररत छन् ।
