काठमाडौं– हतियारसहित नेपाल छिरेका १३ जना सीमा सुरक्षा बल (एसएसबी) लाई ७ घण्टापछि छाडिएको छ ।
सशस्त्र प्रहरी बल केचनाको टोलीले आइतबार बिहान हतियारसहित नेपाल छिरेका १३ जना एसएसबीलाई नियन्त्रणमा लिएको थियो । उनीहरुले भूलवस प्रवेश गरेको भनेपछि छाडिएको झापाका सहायक प्रमुख जिल्ला अधिकारी डम्मरु निरौलाले जानकारी दिए ।
भारतीय काउन्टर पार्टसँगको लामो छलफलपछि उनीहरुलाई छाडिएको उनले जनाए । उनीहरुलाई एसएसबीका कमान्डर डिबी नागीलाई जिम्मा लगाएर पठाएको निरौलाले जनाए ।
