कल्पना त्रिपाठी
घुम्दै फिर्दै बर्ष दिनको, दशैं आयो फेरि !
बुढा बाबा बस्दै होलान्, मूल बाटो हेरि !!
रातो माटो कमेरोले, लिपपोत गरी !
सिंघार्दै छिन् घर आँगन, भाउजु बहिनी छोरी !!
नाना थरी मसला र, बिस्कुन आँगन भरि !
जोहो गर्दै बुढी आमा, भित्र बाहिर गरी !!
कुभिन्डो र काँक्रो खल्पी, अचार शिशि भरि !
केटाकेटी उमङ्गित छन, नयाँ नाना फेरि !!
ठाउँ ठाउँमा रोटेपिङ्ग र, लिङ्गेपिङको झड्का !
बुज्रुकको टिका थाप्न, गरी लामो फड्का !!
थुन्चे भरि दही केरा, पाउर सेल रोटी !
आशिर्वादको बर्षा सँगै, अञ्जुलीमा भेटी !!
साँझ बिहान ट्याम्के बज्छ, दशैँ आयो दशैँ !
देखासिकी चाहाड मान्दा, सर्नु पर्ला वसाइँ !!
घाँटी हेरि गाँस निल्न, नभुले है प्यारा !
घर मूलिले ऋण माथि, ऋणको विचार गर !!
पशु पन्छी जनावरको, किनबेच अति !
अबोधको बध् गरी, मेट्न आत्मरती !!
बलि चढाइ रामको नाममा, जनावरको खती !
अहिंसाको मार्ग देखाउ, दुर्गा भगवती !!
परमात्माको अनुकम्पा, आत्मा सङ्ग जोडौं !
आजै बाट पशु वली, हत्या हिंसा छोडौं !!
सम्यम भई संस्कृतिको, सम्बर्धनमा लागौं !
मानव धर्म पालन गरि, कुरीति लाई त्यागौं !!
रातो टिका अक्षताले, सबको निधार भरुन !
नव दुर्गा भवानीले, मङ्गल कल्याण गरुन !!
हुने खाने सम्पन्नले, बिपन्न लाई हेर !
यो बर्षको दशैं आओस, सहिष्णुता लिएर !!
समाजसेवी तथा सामाजिक अभियन्ता कल्पना त्रिपाठी डाइरेक्टर अक्स् ब्रिज इन्टरनेशनल कलेज नेपाल र लण्डनस्थित पशुपतिनाथ मन्दिर व्यवस्थापन समितीमा पूर्व-महासचिव समेत हुन् ।
