काठमाडौं- काठमाडौं उपत्यका बिहीबार अन्धकार हुनबाट जोगिएको छ ।
प्रतिनिधिसभा र प्रदेशसभा सदस्य निर्वाचनको अघिल्लो दिन बुधबार राति उपत्यकालाई अन्धकार बनाउने उद्देश्यका साथ भक्तपुरमा शक्तिशाली विस्फोट गराइएको नेपाल विद्युत् प्राधिकरणले आशंका गरेको छ ।
निर्वाचन प्रभावित बनाउन खोज्ने तत्वले गलत नियतका साथ भक्तपुरबाट काठमाडौं आइरहेको प्रसारण प्रणालीमा क्षति पुर्याएको प्राधिकरणले जनाएको छ ।
बुधबार राति ९ः०० बजे उपत्यकाको विद्युत् आपूर्तिको मुख्य लाइन भक्तपुर–बानेश्वर ६६ केभी प्रसारणलाइनको दुवाकोटनजिकको खेतमा गराइएको बम विस्फोटका कारण तार चुँडिएको प्राधिकरणले जनाएको छ ।
बम विस्फोटका कारण प्रसारण प्रणालीमा समस्या आएकाले बानेश्वर र पाटन क्षेत्रमा करिब २० मेगावाट विद्युत् आपूर्ति हुन सकेको थिएन ।
विद्युत् आपूर्ति नभएका कारण ती क्षेत्रमा बुधबार साँझ केही समय अन्धकार हुन पुगेको थियो ।
बम विस्फोटनको आवाज आउनसाथ नेपाली सेनाको टोली उक्त स्थानमा पुगेको थियो ।
