बाढीपीडितको शव पहिचानका लागि कुल आचार्य र उत्तम नेपालद्वारा दुई अत्याधुनिक डीएनए परीक्षण उपकरण सहयोग, राहत कोषमा नेपाल परिवारको रु.१ करोड

लन्डन । गैरआवासीय नेपाली संघ (एनआरएनए) का पूर्वअध्यक्ष कुल आचार्य र बेलायतस्थित नेपाली व्यवसायी उत्तम नेपालले हालै नेपालमा आएको विनाशकारी बाढीमा ज्यान गुमाएका व्यक्तिहरूको शव पहिचानमा सहयोग पुर्‍याउने उद्देश्यले दुईवटा अत्याधुनिक QIAGEN TissueLyser III उपकरण प्रदान गरेका छन्।
यसका साथै उत्तम नेपाल र उनको परिवारले प्रधानमन्त्री विपद् राहत कोषमा एक करोड रुपैयाँ (एक करोड नेपाली रुपैयाँ) आर्थिक सहयोगसमेत गरेका छन्।
गत महिना सांसद विदुषी राणाको बेलायत भ्रमणका क्रममा राष्ट्रिय विपद् जोखिम न्यूनीकरण तथा व्यवस्थापन प्राधिकरण (एनडीआरआरएमए) ले शव पहिचानका लागि आवश्यक उपकरण उपलब्ध गराउन सहयोगको अनुरोध गरेको थियो।
सोही अनुरोधअनुसार सांसद राणाले एनआरएनएका पूर्वअध्यक्ष आचार्यसँग एउटा उपकरण उपलब्ध गराउन पहल गरेकी थिइन्। आचार्यले व्यवसायी उत्तम नेपालसँग समन्वय गरेपछि एकको सट्टा दुईवटा पूर्ण उपकरण सहयोग गर्ने व्यवस्था मिलेको हो। आचार्य र नेपालले एक–एकवटा उपकरण उपलब्ध गराएका हुन्।
काठमाडौंमा सोमबार आयोजित विशेष कार्यक्रममा आचार्य, नेपाल र सांसद राणाले संयुक्त रूपमा उक्त उपकरण प्राधिकरणका प्रमुख कार्यकारी अधिकृत डा. धर्मराज उप्रेती र नेपाल प्रहरीका महानिरीक्षक दानबहादुर कार्कीलाई हस्तान्तरण गरेका थिए।
हस्तान्तरण समारोहमा परराष्ट्रमन्त्री शिशिर खनाल, परराष्ट्र सचिव अमृतबहादुर राई, गैरआवासीय नेपाली अभियन्ता उपेन्द्र महतोलगायत विशिष्ट व्यक्तित्व तथा परराष्ट्र मन्त्रालयका अधिकारीहरूको उपस्थिति थियो।
कार्यक्रमलाई सम्बोधन गर्दै परराष्ट्रमन्त्री खनालले विदेशमा रहेका नेपालीहरूले मातृभूमिप्रति देखाउँदै आएको माया, सद्भाव र सहयोगको उच्च प्रशंसा गरे।
उनले मुलुक कठिन परिस्थितिमा परेको समयमा प्रवासी नेपाली समुदायबाट प्राप्त हुने सहयोग अत्यन्त महत्त्वपूर्ण रहेको उल्लेख गर्दै सहयोगीहरूप्रति आभार व्यक्त गरे।
त्यस्तै, सांसद विदुषी राणाले आफ्नो बेलायत भ्रमणका क्रममा नेपाली समुदायसँग भएको भेटघाट स्मरण गर्दै विदेशमा बस्ने नेपालीहरूको मातृभूमिप्रतिको भावनात्मक सम्बन्ध अत्यन्त बलियो रहेको बताइन्।
उनले भनिन्, ‘नेपालीलाई नेपालबाट बाहिर लैजान सकिन्छ, तर नेपालीको हृदयबाट नेपाललाई कहिल्यै निकाल्न सकिँदैन।’
विदेशमा रहेका धेरै नेपालीहरूले आफ्नो दिनको सुरुवात नै नेपालमा के भइरहेको छ भन्ने समाचार हेरेर गर्ने गरेको उल्लेख गर्दै उनले प्रवासी नेपालीहरूको देशप्रतिको चिन्ता र लगावको प्रशंसा गरिन्।
शव पहिचानमा महत्त्वपूर्ण सहयोग पुग्ने
सहयोगस्वरूप उपलब्ध गराइएका दुईवटा QIAGEN TissueLyser III उपकरण नेपाल प्रहरीको केन्द्रीय विधिविज्ञान प्रयोगशालामा डीएनए परीक्षणका लागि आवश्यक नमुना तयार पार्ने कार्यमा प्रयोग गरिनेछन्।
यी उपकरणले प्रयोगशालाको नमुना प्रशोधन क्षमता अभिवृद्धि गर्नुका साथै हालैको बाढीमा ज्यान गुमाएका व्यक्तिहरूको पहिचान प्रक्रियालाई थप प्रभावकारी बनाउन सहयोग पुर्‍याउने अपेक्षा गरिएको छ।
बाढी तथा अन्य प्राकृतिक विपत्तिमा ज्यान गुमाएका व्यक्तिहरूको सही पहिचान हुन नसक्दा परिवारजनले भोग्नुपर्ने पीडा थप जटिल हुने गर्दछ। मृतकको पहिचान सुनिश्चित भएपछि परिवारलाई आफ्ना प्रियजनको अन्तिम संस्कार तथा आवश्यक कानुनी र सांस्कृतिक प्रक्रिया पूरा गर्न सहज हुनेछ।
आचार्य र नेपालले उपलब्ध गराएको प्राविधिक सहयोग तथा नेपाल परिवारबाट प्राप्त एक करोड रुपैयाँको आर्थिक योगदानले विपद्पछिको उद्धार, राहत र मानवीय सहयोगमा महत्त्वपूर्ण टेवा पुग्ने विश्वास गरिएको छ।
यस सहयोगले राष्ट्रिय विपत्तिको समयमा सरकारी निकाय, जनप्रतिनिधि, निजी क्षेत्र र गैरआवासीय नेपाली समुदायबीचको सहकार्य कति प्रभावकारी हुन सक्छ भन्ने उदाहरणसमेत प्रस्तुत गरेको छ।