लण्डन । चार्ल्टन नेपाली समाज यूकेले दशैँ तिहार विशेष कार्यक्रम गर्ने भएको छ । हिन्दुहरुको पारिवारिक मिलन पर्व वडादशैँको अवसर पारेर समाजले यस वर्षको कार्यक्रम अक्टोबर १६ तारिख आईतबार मेरिडियन स्पोर्टस क्लवको सभाहलमा बेलुकी ६ बजेदेखि कार्यक्रम गर्ने कार्यवहाक अध्यक्ष प्रकाश कंडेलले लण्डन नेपाल न्यूजलाई जानकारी दिए ।
कार्यक्रममा पछिल्लो समय युवा पुस्तामा लोकप्रिय गजल एवम् शास्त्रीय गायक राज सिग्देलले एकल सागींतिक प्रस्तुती दिनेछन् । उ जितेर गई या हारेर गई नामक सुगम सगींत पछि चर्चाको शिखरमा रहेका गायक सिग्देलले उक्त कार्यक्रममा आफ्ना गीत संगीतहरु प्रस्तुत गरेर दर्शकलाई मग्नमुग्ध पार्नेछन् ।
कंडेलले सबैलाई विजया दशमीको शुभकामना व्यक्त गर्दै कार्यक्रममा उपस्थित हुन आग्रह गरेका छन् । उनले नेपालीहरुबीच पारिवारिक र आपसी भाईचाराको सम्बन्ध स्थापित गर्ने पर्वको अवसरमा आयोजना गरिएको कार्यक्रम समाजको मात्रै नभएर सबैको कार्यक्रम भएकाले उपस्थित भई र मनोरञ्जन लिन आग्रह गरेका छन् ।
उक्त अवसरमा विजया दशमीको शुभकामना आदान प्रदान सहित अन्य रमाईलो तथा खानपिनको कार्यक्रम समेत राखिएको छ ।समाजकी अध्यक्ष रेखा खरेल केही समय नेपालमै रहेकाले समाजका उपाध्यक्ष कंडेलले अहिले कार्यवहाक अध्यक्षको जिम्मेवारी सम्हालिरहेका छन् ।
कार्यक्रममा प्रवेशका लागि समाजले बयस्कका लागि १५ पाउण्ड र ५ वर्ष भन्दा माथी ११ वर्षसम्मका बालबालिकाहरुका लागी १० पाऊण्ड र ५ वर्ष मुनीका बालबालिकाहरुलाई निशुल्क प्रवेशको व्यवस्था गरेको छ ।
