काठमाडौं– दुई ठुला कम्युनिष्ट पार्टी एमाले र माओवादीबचिको एकतालाई कांग्रेसले स्वागत गरेको छ ।
काँग्रेसका प्रवक्ता विश्वप्रकाश शर्माले लोकतन्त्र दलहरुको विभाजनले नभई एकताले बलियो हुने भएकाले एमाले माओवादी एकतालाई काँग्रेसले स्वागत गरेको प्रतिक्रिया दिए ।
मंगलबार विहान कुरा गर्दै प्रवक्ता शर्माले भने,‘पार्टी फुट्नुभन्दा जुट्नु सुखद पक्ष हँुदैहो, अहिले एमाले र माओवादी एकताका लागि अन्तिम अवस्थामा छन् हामी उनीहरुलाई शुभकामना र बधाई दिन्छौँ ।’
प्रवक्ता शर्माले निर्वाचनअघि नै शान्ति, स्थिरता र सम्बृद्धिका नाममा दुई पार्टीले मत मागेकाले अव त्यो पुरा गरेर देखाउन समेत आग्रह गरे । ‘हामी दुई पार्टीको एकतालाई स्वागत गर्दै विगतमा जनतासँग गरेका बाचा पुरा गरेर देखाउँन आग्रह गर्छौँ । ’
काँग्रेसले दुई दलबीचको सहमति अनुसार सरकारको नेतृत्वमा गरिएको भनिएको पालैपालो नेतृत्वको सवालप्रति भने उदेश्यमा पुग्न सहज नहुने बताएको छ ।
‘एकता हुदै गर्दा स्थिरताको सन्दर्भमा कति गम्भिरता रहन्छ र व्यवहारत लागु हुन्छ त्यो प्रश्नको विषय भएको छ’ कांग्रेस प्रवक्ता शर्माले भने ।
