अमेरिकाको बेभर्ली हिल्स, लस एन्जलस्मा हालै भएको उच्चस्तरीय स्वच्छ खानेपानी सम्बन्धी अन्तराष्ट्रिय गोष्ठी “फाइन वाटर समिट,२०१५” मा नेपालका तर्फ अजय सुमार्गीका छोराले सहभागिता जनाएका छन् । सुमार्गीका जेठा छोरा अभिमतराज सुमार्गीले सो सम्मेलनमा सहभागिता जनाएका हुन् ।
अभिमतराज हिमालयज स्प्रिङ्ग वाटर प्रा.लिका प्रमुख कार्यकारी अधिकृत हुन् । उनले उक्त गोष्ठीमा रसुवा जिल्लाको धुन्चेमा रहेको हिमालयज सिप्रङ्ग् वाटरको उत्पादन अनटप बारे कार्यपत्र प्रस्तुत गर्दै नेपालले अति उच्चस्तरको खानेपानी उत्पादन गर्न सफल भएको र यसको माग अन्तराष्ट्रिय स्तरमा बढ्दै गएको जानकारी गराएका थिए ।
गोष्ठीमा अमेरिका, स्पेन,अष्ट्रेलिया, ब्राजिल, स्वीजरल्याण्ड, दक्षिण अफ्रिका, जर्मनी सहित २० मुलुकका कंपनीका उद्योगपति एवम् विज्ञहरुको सहभागिता थियो । गोष्ठीका विज्ञहरुले नेपालको “अन टप” ब्राण्डको पानीलाई सबैभन्दा स्वच्छ नरम घोषित गरी यो पानी भर्खर जन्मेका शिशुहरुलाई समेत पिलाउन सर्वोत्कृष्ट ठहर गरेका थिए ।
लाङटाङ् हिमालयको पानीलाई प्रशोधन गरी उत्पादन गरिएको “अन टप” काठमाडौंमा अत्याधिक लोकप्रिय हुनुका साथै युनाइटेड अरब इमिरेट्स् , दक्षिण कोरिया, जापान, र युरोपका केही मुलुकमा निर्यात हुदैँ आएको छ ।