काठमाडौं २२ चैत । ‘सित्तैमा पाए अलकत्रा खाने’ आहानै छ । यही आहानलाई चरितार्थ गरेका छन्, पर्यटन बोर्डका कर्मचारीले ।
अख्तियार दुरुपयोग अनुसन्धान आयोगले शुक्रबार विशेष अदालतमा दायर गरेको अभियोगपत्रमा बोर्डका कर्मचारीले सरकारी ढुकुटीबाट २४ लाख रुपैयाँभन्दा बढीको रक्सी खाएको उल्लेख गरिएको छ ।
बोर्डका सञ्चालक तथा पदाधिकारीहरुले २४ लाख रुपैयाँको रक्सीको विल बनाई भ्रष्टाचार गरेको अख्तियारको अभियोगपत्रमा उल्लेख गरिएको छ ।
भ्रष्टाचारीका अनेक रुप
अख्तियारका अनुसार पर्यटन बोर्डमा सामान खरिद नै नगरी विल बनाएर भुक्तानी गरी साढे ४१ लाख झ्वाम पारेको भेटिएको छ । त्यसैगरी कार्यक्रम नै नराखी बिलमात्रै बनाएर साढे ७ करोड रुपैयाँ हिनामिना गरेको अख्तियारको दाबी छ ।
त्यस्तै सवारी भाडामा लिएको भनेर नक्कली बिल बनाई २ करोड रुपैयाँ सकिएको छ । अन्तराष्ट्रिय व्यापार मेलाका नाममा साढे ८ लाख रुपैयाँ सिध्याइएको छ ।
व्यक्तिगत खर्चको बिल बनाएर साढे ४ करोड रुपैयाँ हिनामिना गरेको अख्तियारको अभियोगपत्रमा उल्लेख गरिएको छ ।
त्यसैगरी बैंक खाताबाट निकालेर १ करोड ९० लाख रुपैयाँ, नक्कली हवाइ टिकट पेस गरेर ६१ लाख रुपैयाँ र कर्मचारीका नाममा चेक काटेर ८० लाख ५२ हजार रुपैयाँ हिनामिना गरिएको दाबी गरिएको छ ।
आर्थिक विनियमावलीलाई आफ्नो अनुकूल संशोधन गरेर ६२ लाख रुपैयाँ हिनामिना गरेको अख्तियारले जनाएको छ ।
रकम हिनामिनाका शीर्षकहरू
| क्र.सं. | शीर्षकहरू | बिगो रकम |
|---|---|---|
| १. | कार्यक्रम नगरी बिलमात्र राखी रकम हिनामिना गरेको | ७३९२९५४२ |
| २. | सामान खरिद नगरी बिलमात्र पेश गरी हिनामिना गरेको | ४१६२२०३३ |
| ३ | सवारी भाडाको बिलमात्र पेश गरी हिनामिना गरेको | १९६४२४१३ |
| ४. | मदिरा खरिद गरेको विल संलग्न गरी हिनामिना गरेको | २४७७१०५ |
| ५. | अन्तर्राष्ट्रिय मेलाको नाममा हिनामिना गरेको | ८६४२२५ |
| ६. | व्यक्तिगत कार्यमा खर्च भएको बिल पेश गरी हिनामिना गरेको | ४६४९४८७९ |
| ७. | बैंक खाताबाट रकम निकाली हिनामिना गरेको | ११९०६८०८० |
| ८. | बैंक खाताबाट रकम निकाली हिनामिना गरेको | २७९९९५५५ |
| ९. | नक्कली हवाई टिकट पेश गरी हिनामिना गरेको | ६१३९६१० |
| १०. | कार्यालय सहायक र कर्मचारीको नाममा चेक काटि हिनामिना गरेको | ८०५२६४१ |
| ११ | बोर्डमा आर्थिक विनियम संसोधन गरेर अनियमित खर्च अनुमोदन गरी स्वीकृत गरी हिनामिना गरेको | ६२८२७७ |
| जम्मा बिगो रकम | ३४६९१८३६१ |
