तक्दीर अधिकारी
सिड्नी । पोखरा स्थायी घर भएका अर्जुन अष्ट्रेलियाको ब्रिजवेनमा बसोबास गर्छन् । उनलाई एक साता अघि मात्रै ब्लड क्यान्सर भएको पत्ता लाग्यो । क्यान्सर उपचार महँगो हुने भएकाले तिमल्सिनाले अस्ट्रेलियामा रहेको नेपाली समाजसँग सहयोगको याचना गरेका छन् । तिमल्सिनाकै आग्रहमा ब्रिजवेनमा सक्रिय नेपाली संघसंस्थाहरु सहयोग संकलनमा जुटेका छन् । अहिले उनको उपचारका लागि खर्च जुटाउन अष्ट्रेलियाका नेपालीको सक्रिय देखिएका छन् ।
श्रीमतीलाई नर्सिङ पढाउन डिपेन्डेन्ट भिसामा तिमल्सिना अष्ट्रेलिया आएका थिए । अचानक ब्लड क्यान्सर देखिएपछि भर्खरै पढाइ सकेर संघर्ष गरिरहेका तिमल्सिना दम्पत्ति बिखलबन्दनमा परेका छन् ।
यत्ति मात्र होइन समस्या देखिएकै साता यी दम्पतिले नवजात शिशुलाई जन्म दिएका थिए । श्रीमती सुत्केरी गराउन अस्पताल भर्ना भएकै बखत तिमल्सिनालाई झाडापखालाले सताएको थियो । केही दिनसम्म पनि पखाला निको नभएपछि रगत परिक्षण गर्दा उनमा क्यान्सर भएको पुष्टि भएको थियो । तिमल्सिनालाई किमो दिन थालिएको छ । चिकित्सकले ३ महिनामा बोनम्यारो प्रत्यारोपण गर्न सुझाव दिएका छन् । बोनम्यारो प्रत्यारोपणका लागि परिक्षण गर्न नेपालबाट अर्जुनका भाइसमेत अष्ट्रेलिया आइपुगेका छन् । बोनम्यारो प्रत्यारोपण गर्न कम्तिमा पनि ३ लाख डलर खर्च हुने चिकित्सकले जानकारी दिएको अर्जुनले बताए ।
उनको सहयोगका लागि गैरआवासीय नेपाली संघ (एनआरएनए) कुइन्सल्यान्ड र कास्की समाजले बिशेष सक्रियता का अष्ट्रेलिया मा अवस्थित सम्पूर्ण नेपालीसँग सहयोगका लागी अपिल गरेका छन् । उनीहरुले एक साताअघि नै तिमल्सिनाको स्वास्थ्यबारे जानकारी लिएका थिए । त्यसपछि कुइन्सल्यान्डमा सक्रिय नेपाली संघसंस्थाले सामूहिक रुपमा सहयोग संकलनको तयारीमा जुटेका थिए ।
सहयोग संकलनका लागि एनआरएन कुइन्सल्यान्ड, कास्की समाज अष्ट्रेलिया, नेप्लिज एशोसियसन अफ कुइन्सल्यान्ड (एनएक्यु), कुइन्सल्यान्ड नेप्लिज कम्युनिटी सेन्टर (क्युएनसिसि) र विभिन्न युवा क्लबहरु सक्रिय छन् ।
हिजो आइतबार समाजका प्रतिनिधिहरुले व्रिजवेनस्थित मेटर अस्पतालमा पुगेर बिरामी अर्जुनलाई सहयोग संकलनबारे जानकारी गराएका थिए । भेटका क्रममा उनीहरुले सारा नेपाली एकजुट भएकाले हिम्मत नहार्न हौसला दिएका थिए ।
अर्जुन तिमल्सिनाको नाममा ‘गो फन्ड मि’ नामक वेवसाइटबाट सहयोग संकलन सुरु गरिएको छ । अहिलेसम्म ६८ हजार डलरभन्दा बढी रकम संकलन भइसकेको बताइएको छ ।
पीडित तिमल्सिनाले अस्पतालको शैयाबाट बोल्दै सहयोग रकम सामाजिक संस्थाले सामुहिक रुपमा सञ्चालन गरेका ‘गो फन्ड मि’को एकाउन्टबाट मात्र संकलन गरिदिन सबैमा आग्रह गरेका छन् । आफ्नोबारमा समाचार आएपछि धेरैले सहयोगको प्रतिवद्धता जनाएका तिमल्सिनाले बताए ।
(तस्बिर क्रेडिट नेपाली ट्युब)
पोखरा समाज कास्की ले सहयोगका लागी अष्ट्रेलिया अवस्थित सम्पूर्ण नेपालीसँग अपिल गरेको छ।
सहयोग गर्नेले यो लिंकमा क्लिक गर्नुस् ।
