काठमाडौं– एमाले अध्यक्ष तथा पूर्वप्रधानमन्त्री केपी शर्मा ओलीले सत्तारुढ दल नेपाली कांग्रेस माओवादीले सरकारमा बसेर मनपरी गर्दा पनि मौन भएको बसेको आरोप लगाएका छन् । प्रधानमन्त्री प्रचण्ड नेतृत्वको सरकारले मनपरी गरेपनि पहिलो पार्टी समेत रहेको कांग्रेस भने चुपचाप बस्नु आश्चर्यजनक भएको उनले बताए ।
पत्रकार गोपाल खनालद्वारा लिखित ‘भूराजनीति’ नामक पुस्तकको आइतबार राजधानीमा विमोचन गर्दै ओलीले भने, ‘कांग्रेस देश संकटमा फस्न लाग्दापनि चुईँक्क बोल्दैन । बाघले सिकार खाईसकेपछि उत्तानो परेर सुते जसरी सुतिरहेको छ । के खाएर सुतेको कांग्रेस ?’ उनले कांग्रेससँग विपीको नाम भएको तर नीति र विचार भने प्रष्ट नभएको आरोप लगाए ।
चीनबाट बाटो खोलेर यातायातका साधन चलाउँदा पर्यावरण बिग्रन्छ भनेर सरकारका प्रवक्ता समेत रहेका सूचना तथा सञ्चारमन्त्री राम कार्कीले अभिव्यक्ति दिएको भन्दै उनले त्यसको कडा आलोचना गरे । ‘उनी यो सरकारको प्रवक्ता सरकारको होकि माओवादी को हो ?’, उनले भने ।
उनले आफू प्रधानमन्त्री हुँदा चीनसँग सन्तुलिन राष्ट्रवादको नीति अपनाएर सन्धि सम्झौता गरेको समेत स्पष्ट पारे ।
सो अवसरमा माओवादी केन्द्रका नेता नारायणकाजी श्रेष्ठले देशमा लम्पसार पर्ने प्रवित्ति, दशैं बेचिहाल्यो भन्ने गलत प्रवित्ति र आत्मसम्मान राख्नुपर्छ भन्ने प्रवित्ति रहेको आफू आत्मसम्मान राख्नुपर्छ भन्ने पक्षमा रहेको बताए ।
यस्तै एमाले नेता माधव नेपालले माओवादीलाई शान्ति प्रक्रियामा आफूले ल्याएको भन्दै अब देशमा शान्ति र संविधान आइसकेको अवस्थामा सबै एकजुट भएर अघि बढ्नुपर्नेमा जोड दिए ।
सो क्रममा कांग्रेस नेता रामशरण महत, विश्लेषक तुलानाराण शाह, राजन भट्टराईलगायतले पुस्तकबारे धारणा राखेका थिए ।
