काठमाडौँ- सरकारले आफूलाई जानकारी नै नगराई यहाँस्थित कूटनीतिक नियोगका अधिकारीले आन्दोलनरत मधेसवादी दलका नेतासँग भेटवार्ता गरेकोमा आपत्ति जनाएको छ ।
परराष्ट्र मन्त्रालयका प्रवक्ता ताराप्रसाद पोखरेलले मधेसी मोर्चाका नेतासँग सरकारलाई जानकारी बिना राजदूतले भेट्नु भियना महासन्धि विपरीत भएको बताउनुभयो ।
मधेसी मोर्चाका नेतासँग यहाँस्थित कूटनीतिक नियोगका प्रमुख तथा पदाधिकारीले सरकारको जानकारीबिना भेट्नु कूटनीतिक आचारसंहिता, कूटनीतिक सम्बन्ध, विद्यमान परराष्ट्र मामिलाको अभ्यास विपरीत रहेको परराष्ट्रको धारणा छ ।
नेपालको आन्तरिक मामिलामा सरकारको जानकारीबिना राजनीतिक दलका नेतासँग भेट्नु जायज नभएको समेत परराष्ट्रले ध्यानाकर्षण गराएको छ ।
तराई मधेसमा आन्दोलनरत दलले बिहीबार यहाँस्थित कूटनीतिक नियोगका अधिकारीसँग सरकारले आफूहरुको माग सम्बोधन नगरेको गुनासो गरेका थिए ।
