काठमाडौं १ मंसिर, । अष्ट्रेलियाका फास्ट बलर मिचेल जोनसनले अन्तराष्ट्रिय क्रिकेटबाट सन्यासको घोषणा गरेका छन् ।
पर्थमा जारी न्यूजिल्याण्डविरुद्धको दोस्रो टेष्ट नै उनको करियरको अन्तिम अन्तराष्ट्रिय क्रिकेट हुनेछ । ‘गुडवाइ भन्ने यो नै उपयुक्त समय हो’ जोनसनले भने, मैले देशका लागि खेल्दा हरेक क्षण आनन्द लिएँ ।’
३४ वर्षका जोनसनले अष्ट्रेलियाको चौथो सर्वाधिक विकेट टेकरका रुपमा मैदान छाड्दैछन् । उनले ७७ टेष्टमा ३११ विकेट लिएका छन् ।
टेष्ट क्रिकेटमा उनको उत्कृष्ट प्रदर्शन २०१४ मा दक्षिण अफि्रकाविरुद्धको टेष्टमा १२-१२७ हो, जुन खेल अष्ट्रेलियाले जितेको थियो । आफ्नो टोलीले हार्दा उनले २००८ मा दक्षिण अफ्रिकाविरुद्धको टेष्टमा ६१ रन दिएर ८ विकेट लिएका थिए ।
उनले १५३ वन डे र ३० टी-२० पनि खेलेका छन् । वन डेमा उनले २३९ विकेट लिएका छन् भने टी-२० मा ३८ विकेट उनको नाममा छ ।
