लन्डन । तामाङ समुदायको कला, संस्कृति र पहिचानलाई अन्तर्राष्ट्रिय स्तरमा उजागर गर्ने लक्ष्यसहित आयोजना हुन लागेको ‘फस्ट तामाङ फेस्टिभल लन्डन २०२६’ झन् रोमाञ्चक बन्दै गएको छ। चर्चित गायक राजु लामा बेलायत आइपुगेसँगै फेस्टिभलको माहोल तातेको छ।
मंगोलियन हर्टका प्रमुख गायक लामा यस ऐतिहासिक फेस्टिभलमा मुख्य आकर्षणका रूपमा प्रस्तुत हुँदैछन्। तामाङ समाज यूकेको आयोजनामा आगामी अगस्ट १, शनिबार लन्डनको ग्रीनफोर्डस्थित वुडल्यान्ड राइजमा हुने कार्यक्रमले नेपाली समुदायमा उत्साहको लहर ल्याएको छ।
महासचिव रोज दोङका अनुसार कार्यक्रमलाई भव्य बनाउन तीव्र तयारी भइरहेको छ। फेस्टिभलमा नेपालबाट आएका चर्चित कलाकारहरूको लाइभ प्रस्तुति, तामाङ संस्कृतिका झाँकी, परम्परागत नृत्य र स्वादिष्ट खानाका स्टलहरू रहनेछन्।
विशेष आकर्षणका रूपमा राजु लामा, विश्व दोङ, मनमाया वाइबा, जितु लोप्चनलगायत कलाकारहरूको प्रस्तुति रहनेछ, जसले कार्यक्रमलाई झनै भव्य बनाउने अपेक्षा गरिएको छ।
