लण्डन । शुक्रबार सांझ नर्थवेस्ट लण्डन क्षेत्रका नेपाली महिलाहरुले सामुहिक दर र नाचगानहित तीज मनाएका छन् ।
यति नेपाली एशोसिएसकी अध्यक्ष पिपला देवानको आयोजनामा दिउंसोदेखि नै भेला भएका दिदीबहिनीहरु मध्यरातसम्मै नाचगान गरे ।
सो अवसरमा सहभागीहरुबीच नृत्य प्रतियोगिता पनि आयोजना गरिएको थियो जसमा १५ जनाले भाग लिएका थिए । उत्कृष्ट नाचका लागि पहिलो पुरस्कार देविका रायमाझीले पाइन भने सम्झना थापा र बिना गुरुंगले क्रमश दोस्रो र तेस्रो पुरस्कार पाए ।
त्यस्तै उत्कृष्ट इन्टरटेनरका रुपमा भक्तिमाया राईलाई एक विशेष पुरस्कार दिइयो ।
प्रतियोगितका प्रतिस्पर्धीहरुको प्रस्तुतिको मुल्यांकन गर्ने निर्णायकमा लण्डन नेपाल न्यूजका निर्देशक इञ्जिनियर आरके त्रिपाठी, रमेश क्षेत्री लगायत थिए । यति एशोसिएसनका पूर्व अध्यक्ष उमेशराज मोक्तानले विजेताहरुको घोषणा गरिदिएका थिए ।
कार्यक्रममा उपस्थित सम्पुर्ण दिदीबहिनीलाई यति अध्यक्ष देवानले तीजको शुभकामना दिदैं विशेष उपहार बांडेकी थिइन ।
त्यसअवसरमा एनआरएन यूके उपाध्यक्ष हिराधन राई, यतिका सल्लाहकार दौलत राई, पत्रकारहरु नविन पोखरेल र शिव भण्डारी, बुटवलस्थित होराइजन कलेजका भाइस प्रिन्सिपल बासुदेव अर्याल, कोशेली समुहका विरेन्द्र कुंवर लगायतका यहांस्थित नेपाली समुदायका केहि अगुवाहरु समेत उपस्थित थिए ।
कार्यक्रमको संयोजन एलिजा देवानले गरेकी थिइन ।
