लन्डनमा मैत्रीपूर्ण क्रिकेटको तयारी तीब्र, १० हजार दर्शक उतार्ने तयारी

लन्डन- आगामी जुलाई १९ तारिखका दिन लण्डनको लर्ड्स विश्वविद्यालयको क्रिकेट मैदानमा हुने नेपाली क्रिकेट टिम र मार्लेबोन क्रिकेट क्लव (एमसीसी)बीचको मैत्रीपूर्ण क्रिकेटको तयारी तीब्र पारिएको छ ।

क्रिकेट खेलमा १० हजार दर्शक उतार्ने तयारी भएको छ । मैत्रीपूर्ण खेल सफल बनाउन एनआरएनए यूकेले उपाध्यक्ष हिराधन राईलाई संयोजक तोकेको छ । राईसहित एनआरएनए यूके सल्लाहकारहरु शिवजी श्रेष्ठ, भीम महेन्द्र गुरुङ, उपाध्यक्ष शान्ति थापा कुँवर, प्रवक्ता खुशी लिम्बु र सदस्य डा. राजेन्द्र थापाको समूहले तयारीलाई तीब्र बनाएको छ ।

राईले खेलबारे जानकारी दिन एवं भावी रणनीति तय गर्ने सम्वन्धमा छलफल गर्न शुक्रबार विभिन्न संघसंस्थाका प्रतिनिधि र सञ्चारकर्मीहरुको एउटा भेला समेत राखेको बताए। राईले बेलायत नेपाल कुटनीतिक सम्वन्ध स्थापनाको दुई सय वर्षका अवसरमा हुन लागेको उक्त खेल विशेष महत्वको भएकाले सहभागी भइदिन सबैमा आग्रह गरेका छन् ।

खेल सफल बनाउन लन्डनस्थित नेपाली दूतावास, एनआरएन यूके, नेपाल पर्यटन बोर्ड यूके र नेपाली युवाहरुको विशेष सक्रियता छ ।

मैत्रीपूर्ण खेलको प्रचारप्रसारका लागि नेपाल पत्रकार महासंघ बेलायतले पनि सक्रियता बढाएको छ । गत जुन ८ तारिखका दिन लण्डनस्थित नेपाली दूतावासमा बसेको सर्वपक्षीय बैठकबाट खेलको प्रचारप्रसारको संयोजन गर्ने मुख्य जिम्मा पाएको महासंघले सोहि प्रयोजनका लागि एक छुट्टै समिति नै गठन गरेर काम अघि बढाएको छ ।

बुधबार अध्यक्ष नरेश खपांगी मगरले विज्ञप्ती जारी गर्दै सल्लाहकार नविन पोखरेलको संयोजकत्वमा ९ सदस्यीय प्रचारप्रसार समिति गठन गरिएको जानकारी गराएका छन ।

सो समितिमा महासंघ बेलायतका उपाध्यक्ष ध्रुबराज अर्याल, सचिव शिव भण्डारी, कोषाध्यक्ष पुर्ण गुरुङ, सदस्य नरेन्द्र बस्नेत तथा सभासदहरु दिनेश परियार, एभरेष्ट गौतम, फणिन्द्र भट्टराई र प्रमिला राई सदस्य छन ।

समितिलाई आवश्यकताअनुसार सदस्यहरु थप गर्न र जिम्मेवारी बाँडफाँड गर्न समेत अधिकार दिइएको छ ।  बेलायतस्थित सबै मुख्य नेपाली मिडिया र क्रियाशिल पत्रकारहरुको प्रतिनिधित्व हुने गरी महासंघले यो प्रचारप्रसार समिति बनाएको हो ।

प्रचारप्रसार समितिका संयोजक पोखरेलले सो खेलमा दश हजार दर्शक उतार्ने लक्ष्य राखिएकोमा त्यसका लागि आवश्यक माहोल बनाउने ढंगले प्रचारप्रसारलाई तिब्रता दिइने बताएका छन ।

खेलमा सहभागिता बढाउने उद्देश्यसहित दूतावासको संयोजनमा गठित आयोजक समिति अन्तर्गत पिआर व्यवस्थापन समितिका संयोजक पत्रकार एभरेष्ट गौतमले ५२५ टिकट आफूहरुले बुझिसकेको र उपलव्ध टिकेट बिक्री भइसकेपछि थप टिकट झिकाइने बताए ।

आजसम्म उक्त खेलका लागि करिब  २८०० टिकट बिक्री भइसकेको छ । टिकेट किन्न चाहने दर्शकले आयोजक समितिका अभियन्ताहरुलाई सम्पर्क गरेर टिकट लिन सक्नेछन् । सिधै प्रिन्टेड टिकट लिंदा पनि अनलाइनमै लिएजस्तै १० पाउण्ड मात्रै लाग्ने टिकेटिङ संयोजक राजन खकुरेलले बताए ।

एनआरएनए यूके कोषाध्यक्ष तथा आर्थिक समितिको नेतृत्व गरिरहेका दीपक श्रेष्ठले सम्पूर्ण बेलायतबासी नेपालीहरुलाई एकजुट भएर खेलमा उपस्थित हुन आव्हान गरेका छन् । उक्त मैत्रीपूर्ण खेलमा १० हजार दर्शक उतार्ने चुनौतीबीच यतिखेर बेलायतको नेपाली समुदाय एकसाथ लागिरहेको छ ।

यसैबीच आयोजक समितिले सो खेललाई लक्षित गर्दै नेपालबाट नेपाली क्रिकेट टोलीको जर्सी लन्डन ल्याइसकेको छ । एक जर्सीका लागि १० पाउन्ड पर्ने र जर्सी तथा टिकट किन्न चाहनेहरुले आयोजक समितिका निम्न व्यक्तिलाई सम्पर्क गर्न सक्नेछन् ।

दीपक श्रेष्ठ-  07943866690

राजन खकुरेल-  07938623803

एभरेस्ट गौतम- 07838504092

कृष्णप्रसाद शर्मा- 07415360712

खेल हेर्न प्रवेश शुल्क जम्मा १० पाउण्ड तोकिएको छ । संकलित रकमको ५० प्रतिशत नेपालको पुनर्निर्माणमा पठाउने आयोजकको तयारी छ ।

६५ वर्ष माथिकालाई ५ पाउण्ड र १६ वर्ष मुनिकालाई निःशुल्क खेल हेर्ने व्यवस्था मिलाइएको छ ।